Jang, Jangan Ekau Cayo Ngan Bomoh Eh Dooo

1. Toghuih toghang Jang, jangan sosokali ekau poie jumpo bomoh dukun pawang tu sumuo ...
2. Sobab tu sumuo pombongak yooo, baco jampi soghapah tado kono mongono ngan ajaran ugamo ...
3. Sumuo eh pakai jin, khadam, polosit, antu ghayo .... jangan dicayo kato ado wali songo ko, koghamek idup ko, rajo / putri bunian koo ...
4. Sumuo eh jatuh syirik Jang ... sobab bodampengan ngan Jin bulih bata syahadah, Jang ...
5. Den cumo monogur yo, sobab ughang kito bab bomoh eh, numbo satu eh dooo
6. Ikuit ngan adek yang udah ditingga sobab khurafat, sampa diboie dek waghieh bukan takat harto bondo, tapi 'bondo' yang satu laie pon diboie eh ....
7. Uissshhh, naik udah monghomang bulu idong ngan bulu kotiak den ni haaa
8. Apo pun, kuaso Allah mongatasi sogalo2 yang diamal ulih bomoh pawang dukun sogalo ...
9. Ekau lotak kopocayaan sumuo pado Allah, bukan kek koso sakti siher popawang dukun bomoh eh ..
10. Sobab Allah Maha Bosa, tiado Tuhan solaen Allah, dan Nabi Muhammad posuruh-Nya .... Ingek Jang ...

P/S: Den pon boringek juo .... Ekau sumuo pon samo, boringek gak ...

Jaman Dolu2 Edisi Jopun

1. Jaman Jopun monghentah Malaya dolu, den bolum ado laie jadi ni cito ughang totuo uwan unyang ...
2. Ughang Jopun toghojah Malaya pakai beskal yo, masuk kek Kolantan, Kodah tup tup ... udah sampai ko Tambak Johor.
3. Idop jaman Jopun eh susah caie makan, padi bogheh sumuo di-boie kek Jopun ....
4. Makan ubi kayu yo laaa .... sayur amek kangkung bolakang umah
5. Duit Jopun cap pisang pun idak laku eh do .... bobakul kumpo baghu cukuip boli solipa Jopun yo.
6. Sojar Jopun suko boie makan kek ughang Molayu ... boie makan ponampa Jopun, kono sokali toghuih tanak lagi eh doooo
7. Kalu simpan radio kek umah, silap aribulan palo otak topisah daie badan kono podang samurai Jopun.
8. Ompuan mudo2 dagho ko jando ko, disoghok makpak kek umah takuit Jopun amik pakso rampeh buek gundek.
9. Kalu kono tangkap Jopun, huiii, ayer sabun-O tarik yo la ekau bulih wat minom sampai kombung poghuit eh, lopeh tu dipijak2 poghuit eh ....
10. Jaman skang, Jang oiiii, ekau ughang pakai guno somuo baghang Jopun, nengok katun Jopun, nek keto Jopun, mutu Honda Ex-5 Jopun pobalo sumuo .... kang den lompang Jopun kang ...

P/S: Den pun pakai baghang Jopun juo ... Ngehehehe

Apo koba, waghieh sumuo .... jompuit jonguk blog den

1. Pokoba sumuo waghieh2 anak Nogoie .... den idop laie eh do ...
2. Idak disangko, pojam colik pojam colik ... udah ompek tahun ....
3. Macam2 pongalaman den tompuhi, ughang yang den jumpo ...
4. Den manusio eh do, ado maso kek ateh, ado maso kek bawah ...
5. Apo pun, rojoki ni rahmek Allah juo ...
6. Den bukan poie mano tigo ompek tahun eh ... poie bo-tapo yooo
7. Mongonang 'an cinto kaseh bolum eh kosampaian ....
8. Syahdu yoooo ati eh .... tibo2 toghaso jiwang ...
9. Tokonang somaso dolu .... maso den bujang sonang laie ...
10. Sokaghang eh udah jadi tarap bujang lapok eh dooo ....

Eh Jang, ekau poso ko?

1. Ha'ah, den tongah poso sokaghang eh ...
2. Uihhh, ghaso lapar ngan haus eh idak totahan ...
3. Tambah laie tompek kojo kono naek bukit, kek ateh nun opis ....
4. Kono naek tanggo laie duo tingkek ... cobaan eh do ..
5. Dipikirkan, mau yo den monyusup poie bilik ayer, montokodaghah ayer paip-si ....
6. Tp doso bosa putuihkan poso ... malaikat dok botenggek kek bahu catit somuo bondo yg nak dibuek kito ..
7. Susah nak dapek pahalo, sonang nak caie doso ... toghutamo maso poso.
8. Sobolum den to-lupo ... ari eh ghaso nak maghah yooo ....
9. Apo kah poso eden akan kogheng sobab den nak lompang tongkuk ughang bulan2 poso nan mulia eh?
10. Apo pun, solamek boposo daie den.

Eh Jang, ekau buek apo? Kojo ko?

1. Ha'ah, eden sokaghang eh tongah kojo ...
2. Ado maso sket, den cughi men MukoBuku ...
3. Maso tongahaghi, den amek maso tido kojap dalam sotongah jam
4. Masok kojo balik, buek kojo ahhhh ... sambil ngacau aweks opis den ..
5. Balik kang ... monumpang komuter ehh, ponuih cam tin sardin ..
6. Sampai umah, nengok TiBi ...
7. Lopeh tu ko kodai mamak sobab den nak montokodaghah ....
8. Lepak layan bola ... tokinjo2 cam boghuk bilo GOLLLLLLLLLL ....
9. Masih laie lepak kek mamak .... tapi udah paneh ati monyoghanah bilo tim bola udah kalah ...
10. Masuk tido pun monyoghanah idak pueh ati .... cissss .... esok lak kono kojo ...

Eh Jang, montokodaghah ko?

1. Eden nak coghito bab sumuo ughang paling suko .... bab montokodoghah ... makan ahh ..
2. Soal makan, den sangguip boghabeh duit somato2 nak moghaso makanan yg sodap2 ...
3. Sobab makan lobeh afdhal daie poghabeh duit poie kolab dangduit, clubbing minom koncing setan apokojadahsumuohagham eh do.
4. Bilo udah montokadaghah (tambah laie ughang bolanjo makan pocumo), kono pulak eh ado sambal bolacan pokono ngan ulam2 .... huiiiii ....
5. Den kalu montokodaghah sambal bolacan, sangek lah tojatuh chento tak ingek kek laen ....
6. Kalu bab montokodaghah eh eden idak la momileh bobona, asal sodap di muluit eh, masuk ko poghuit kolua jadik taik juo ...
7. Asal mano halal tobukti, den sobek yooo, mau laie makan pocumo, 'pree of caj' kato mat saleh coluip ...
8. Makan eh rozoki, jangan ditolak, moghano poghuit ehhhh .... tambah laie makan pocumo
9. Tiko sobolum makan, jangan dilupo baco Bismillah, kang setan aposumuokoghabekjin datang kongsi makanan ekau, jang ...
10. Bocoghito bab montokodaghah ni, den plak ghaso lapar nak makan, den poie caie makan dolu, jang!

Apo Kono Eh Jang? Bolagu lah pulakkk ..

1. Toghuih toghang, den kokoghengan ideo nak monulih.
2. Kato omputeh, 'writer's block' apokojadah eh ...
3. Bilo takdo mondo dalam palo lutuit den, den donga lagu ..
4. Huii, minang coluip cam den goma donga lagu kobangsaan Nogoie 9
5. Bukan eh lagu resmi Nogoie bobudak nyanyi kek skula eh ..
6. Lagu Apo Kono eh Jang (femes den) dilagu eh Ally Noor ngan Mastura
7. Kombang lobang idung den bobanggo ngan lagu eh
8. Lagu moncoghomin koiedopan den kek muko bumi eh
9. Sobab den memang bujang laie .....
10. Apo kono Jang oiiiii ...... tolopeh si Milahhhhh .....

P/S: Nak mondonga lagu eh, silo jonguk kek sini